Şəki PFK rəhbərliyi komandanın bir neçə futbolçusunun II Liqanın son turunda keçirilən oyunda iştirakdan imtina etməsi ilə bağlı ictimaiyyətə açıqlama yayıb.
Shimal.News xəbər verir ki, klub rəhbərliyi həmin futbolçuların ikinci dövrədə keçirdikləri oyunlara və may ayına qədər olan bütün aylar üzrə əməkhaqlarını aldıqlarını bildirib. Açıqlamada qeyd olunub ki, hazırda may ayı ərzində cəmi iki oyun keçirilib və hər hansı rəsmi maaş gecikməsi qeydə alınmayıb.
Buna baxmayaraq, bəzi oyunçular tərəfindən "son oyundur, ödəniş edilməyə bilər" iddiası irəli sürülərək ödənişin əvvəlcədən tələb edildiyi, daha sonra isə oyunda iştirakdan imtina edildiyi vurğulanıb.
Oyunda iştirak etməyən futbolçuların adları da açıqlanıb:
Rəsul İbrahimov
Zaur Fərzəliyev
Çərkəz Hüseynov
Mehdi Həşumov
Nazim Bağırov
Klub daxilində aparılan araşdırma zamanı komandanın kapitanı Rəsul İbrahimovun digər futbolçularla əlaqə saxlayaraq onların da oyuna çıxmaması üçün çağırış etdiyi iddia olunub. Bildirilib ki, bəzi oyunçuların oyuna gəlməsinə mane olunduğu üçün komanda XXVII turun Ağstafa Gəncləri ilə qarşılaşmasına cəmi 9 futbolçu ilə çıxıb.
Klub rəhbərliyi baş verənləri peşəkar futbol prinsiplərinə və daxili intizam qaydalarına zidd davranış kimi qiymətləndirib. Açıqlamada futbolçulara hüquqi addımların atılacağı barədə əvvəlcədən xəbərdarlıq edildiyi də qeyd olunub.
