İsmayıllıdan olan şəhid idmançıların ailələri ziyarət edilib. ShimalNews bu haqda 2 mart tarixində xəbər verir.
Dağlıq Şirvan Regional Gənclər və İdman İdarəsinin əməkdaşları əvvəlcə şəhid Aqil Mirzəliyevin evində olublar. Burada şəhidimizin keçdiyi döyüş yolundan danışılıb, onun üçün ayrılmış guşəyə baxılıb.
Aqil dəfələrlə respublika fənn olimpiadalarında, bilik və intellektual yarışlarda çempion olub. Hələ erkən yaşlarından həvəskar futbolçu olub. Hətta qollarından birini AFFA "ilin qollarından biri" kimi təqdim etmişdi.
Vətən müharibəsi zamanı o, Murovdağ, Cəbrayıl, Füzuli və Hadrut istiqamətlərində vuruşub. 20 oktaybr 2020-ci ildə Xocavənd rayonunun Tuğ kəndi istiqamətində şəhadətə ucalıb. Ölümündən sonra "Xocavəndin azad olunmasına görə", "Kəlbəcərin azad olunmasına görə", "Füzulinin azad olunmasına görə" və "Cəsur döyüşçü" medalına layiq görülüb.
İdarə üzvləri şəhid Vüsal Dəmirovun da ailəsinə baş çəkiblər. Otağındakı döyüş xatirələrinə, medallarına baxılıb, keçdiyi cəsur döyüş yolundan bəhs edilib.
Vüsal Dəmirov region yarışlarının, klublar və cəmiyyətlərarası cüdo birinciliklərinin mükafatçısı, Bakı şəhər açıq birincilikləri və Azərbaycan çempionatlarının iştirakçısı olub.
Qəhrəmanımız Füzuli rayonunun azadlığı uğrunda döyüşlərdə şəhidlik zirvəsinə ucalıb. Şəhadətindən sonra "Vətən uğrunda", "Füzulinin azad olunmasına görə" və "Xocavəndin azad olunmasına görə" medalları ilə təltif olunub.
Daha sonra şəhid Tural Şıxızadənin ailə üzvləri ziyarət edilib. Şəhidin otağında ondan qalan xatirələrə baxış keçirilib, xatirə kitabına ürək sözləri yazılıb.
Tural Şıxızadə qol güləşi ilə məşğul olub. 2018-ci ildən yarışlara qatılıb. Bu müddət ərzində 6 medal, 11 diplom qazanıb. Həmçinin ölkə birincliyinə layiq görülüb.
Goranboy rayonunda həqiqi hərbi xidmət keçən Tural müharibə başladığı gündən döyüşlərə qatılıb. 71 günlük axtarışdan sonra onun şəhid olduğu məlum olub. Oktyabrın 1-də Ağdərə istiqamətində gedən döyüşlərdə həlak olan Tural dekabrın 11-də İsmayıllı rayon Diyallı kənd qəbiristanlığında torpağa tapşırılıb.
Şəhid idmançımız ölümündən sonra "Vətən uğrunda", "Cəsur döyüşçü" və "Suqovuşanın azad olunmasına görə" medalları ilə təltif edilib.
