Martın 8-də cüdo üzrə U-17 yeniyetmələr arasında keçirilən "İstedadların seçimi" yarışının II turu başa çatıb.
Shimal.News xəbər verir ki, turnirdə diqqət çəkən məqamlardan biri Qubadan olan Milli qəhrəman Mehrab Niftəliyevin qızı Ləman Niftəliyevanın növbəti uğuru olub.
Abşeron Olimpiya İdman Kompleksində keçirilən yarışa 64 klub və idman cəmiyyətindən ümumilikdə 265 idmançı (222 oğlan, 43 qız) qatılıb.
Yarışın son günündə 8 çəki dərəcəsində 134 cüdoçu tatamiyə çıxıb. Qızlar -44 kq, -52 kq, -63 kq və +70 kq, oğlanlar isə -55 kq, -66 kq, -81 kq və +90 kq çəki dərəcələrində mübarizə aparıblar.
Qızların -44 kq çəki dərəcəsində çıxış edən Ləman Niftəliyeva (Sumqayıt şəhəri 2 nömrəli UGİŞM) bütün rəqiblərini üstələyərək birinci yerə layiq görülüb. O, Qubadan olan qəhrəman Mehrab Niftəliyevin qızıdır və qazandığı bu uğurla həm idman ictimaiyyətinin, həm də izləyicilərin diqqətini cəlb edib.
Bu çəki dərəcəsində ikinci yeri Ayşən Hüseynzadə (Qara Bəbir Sumqayıt), üçüncü yeri isə Zəhra Rzazadə (Bakı şəhəri 13 nömrəli İOEUGİM PHŞ) tutub.
Qeyd edək ki, "İstedadların seçimi" turnirinin keçirilməsində məqsəd milli komanda üçün perspektivli idmançıların müəyyənləşdirilməsi, sağlam alt bazanın formalaşdırılması və gələcək ehtiyat qüvvənin hazırlanmasıdır. İki turun yekun reytinqində hər çəki dərəcəsi üzrə ilk 4 pillədə qərarlaşan idmançılar "Gələcəyin ümidləri" təlim proqramına cəlb olunacaqlar.
