Quba şəhərində bədii gimnastika üzrə "Grace of Nature" yarışının açılış mərasimi keçirilib.
“Azərtac”ın məlumatına görə, tədbir Quba Olimpiya İdman Kompleksində təşkil olunub.
Kompleksin direktoru Cavid Seyidov bu cür yarışların bölgələrdə keçirilməsinin böyük əhəmiyyət kəsb etdiyini bildirib, ölkə rəhbərliyinin idmana olan diqqət və qayğısından söz açıb.
Daha sonra açılış mərasimi bədii hissə ilə davam edib. Bədii gimnastlar musiqi sədaları altında maraqlı rəqs şousu nümayiş etdiriblər.
Üç gün davam edəcək yarışda (sentyabrın 26-dək) fərdi proqramlar və qrup hərəkətləri üzrə qaliblər müəyyənləşəcək. Gimnastlar kiçiklər (2017-2018-ci il təvəllüdlü), balacalar (2014-2016-cı il təvəllüdlü), yeniyetmələr (2012-2013-cü il təvəllüdlü) və gənclər (2009-2011-ci il təvəllüdlü) yaş kateqoriyasında çıxış edəcəklər.
Fərdi yarışda çoxnövçülük və fərdi alətlər, qrup hərəkətlərində isə iştirakçılar yalnız fərdi alətlər üzrə proqramla mübarizə aparacaqlar. Turnirdə ölkənin müxtəlif klublarından idmançılar iştirak edəcəklər.
