Quba Olimpiya İdman Kompleksinin stadionunun ot örtüyünün Misli Premyer Liqasında 17-ci turun "İmişli" – "Araz-Naxçıvan" oyunu üçün hazırlanmasına başlanılıb.
Shimal.News xəbər verir ki, bu barədə stadionun icarədarı olan "İmişli" klubunun icraçı direktoru Aqşin Mürsəlov məlumat verib. Onun sözlərinə görə, narazılıq doğuran seyrək sahələrə toxum səpilir və dərmanlama işləri aparılır.
A.Mürsəlov qeyd edib ki, stadiondakı qarın əriməsi ilə işlərin tempi xeyli artıb.
"Artıq mövsümün ortası olduğu üçün ot örtüyünün tam dəyişdirilməsi mümkün deyil. Lakin mövcud örtüyü maksimum dərəcədə yaxşı vəziyyətə gətirmək üçün stadion əməkdaşları əllərindən gələni edirlər. Bizim də əsas tələbimiz budur. Stadionu müqavilə əsasında götürmüşük və normal vəziyyətdə təhvil verilməsini istəyirik. Bildirilib ki, yanvarın 20-dək işlər tamamlanacaq və arena bizə təhvil veriləcək. Meydançaya peşəkar mütəxəssislər qulluq edir. Bu baxımdan arxayınıq ki, 2026-cı ildə ilk ev oyunumuzu normal şəraitdə keçirə biləcəyik", – deyə Aqşin Mürsəlov sportnet.az-a açıqlamasında bildirib.
Qeyd edək ki, "İmişli" qış fasiləsindən sonra ilk oyununu yanvarın 23-də keçirəcək. Misli Premyer Liqasının 17-ci turuna təsadüf edən qarşılaşmada rəqib "Araz-Naxçıvan" olacaq. Quba Olimpiya İdman Kompleksinin stadionunda təşkil olunacaq matç saat 14:30-da başlayacaq.
