"Quba" futbol komandası ciddi maliyyə problemləri ilə üzləşdiyini açıqlayıb.
Shimal.News xəbər verir ki, komanda rəhbərliyi və üzvləri tərəfindən yayılan müraciətdə bildirilib ki, qarşıdakı oyun üçün səfər və təşkilati xərclərin qarşılanmasında çətinlik yaranıb. Bu səbəbdən komandanın növbəti qarşılaşmaya çıxıb-çıxmayacağı sual altındadır:
""Bu statusu yazmaq bizim üçün çox ağırdı. Sabah "Araz Saatlı" ilə oyuna çıxmalı idik, amma bu, ciddi sual altındadır. Səbəb hamıya bəllidi... Yol xərclərini qarşılaya bilmirik. Uşaqlar aylarla heç nə gözləmədən, sadəcə Quba futbolunun adı üçün təmənnasız oynadılar. Hamı döyüşmək istəyir, amma bəzən istəmək kifayət etmir".
Müraciətdə ictimaiyyətə və azarkeşlərə dəstək çağırışı da yer alıb. Bildirilib ki, kiçik məbləğlər belə komandanın problemlərinin həllinə kömək edə bilər və kollektivin fəaliyyətini davam etdirməsində mühüm rol oynaya bilər.
Komanda üzvləri əsas məqsədlərinin qarşıdakı oyuna çıxmaq və fəaliyyətlərini davam etdirmək olduğunu vurğulayıblar.
