1988-ci ildə istifadəyə verilən Oğuz rayon mərkəzi stadionu uzun illərdir baxımsız vəziyyətdədir.
Məlumata görə, vaxtilə şəhər sakinlərinin əsas idman məkanlarından biri olan stadion hazırda ciddi problemlərlə üzləşib.
Stadionda futbol oynamaq və digər idman növləri ilə məşğul olmaq hələ də mümkündür. Lakin infrastrukturun vəziyyəti sakinlərin narazılığına səbəb olur.
Futbolçular üçün nəzərdə tutulan soyunub-geyinmə otaqları yararsız hala düşüb. İdmançılar bəzən paltarlarını stadionun açıq ərazisində dəyişməli olurlar.
Sakinlərin sözlərinə görə, əraziyə uzun müddətdir lazımi səviyyədə qulluq olunmur. Ot örtüyünün biçilməsi kimi işləri bəzən özləri həyata keçirirlər.
Onlar bildirirlər ki, əvvəllər stadionda futbol oyunları ilə yanaşı müxtəlif tədbirlər də keçirilirdi, qarşılaşmaları izləmək üçün çoxsaylı tamaşaçılar toplaşırdı.
Hazırda isə stadionun bəzi tikililəri və yardımçı sahələri baxımsız vəziyyətdədir.
Oğuz sakinləri idman qurğusunun yenidən təmir olunmasını, ərazinin abadlaşdırılmasını və stadionun əvvəlki vəziyyətinə qaytarılmasını istəyirlər.
Mənbə: Baku TV
