Qusar, Quba, Xaçmazdan və digər rayonlardan yeniyetmə və gənc voleybolçular arasında seleksiya yarışı təşkil edilib. Bu barədə ShimalNews 8 iyun tarixində Azərbaycan Voleybol Federasiyasına (AVF) istinadən məlumat verir.
Qusar Olimpiya İdman Kompleksində keçirilən turnirdə 15 yaşadək qızlar və oğlanlardan ibarət 14 komanda mübarizə aparıb. Qızların yarışında “Siyəzən”, “Xaçmaz”, “Quba”, “Qusar-1”, “Qusar-2”, “Sumqayıt-1”, “Sumqayıt-2”, oğlanların yarışında isə “Siyəzən”, “Şabran”, “Qusar-1”, “Qusar-2”, “Xaçmaz”, “Quba-1”, “Quba-2” komandaları çıxış ediblər.
Oğlanların yarışında “Qusar” qızıl, “Quba” kollektivi gümüş medal qazanıb. Qızların mübarizəsində isə “Sumqayıt-1” komandası turnirin 1-cisi, “Sumqayıt-2” isə 2-cisi olub.
Sonda qaliblərə kubok, medallar və diplomlar təqdim edilib.
Təcrübəli türkiyəli voleybol mütəxəssisi Şahin Çatma bu yarışı izləyib və uşaqlarla görüşüb. O, kriteriyalara uyğun gələn istedadlı voleybolçuların qeydiyyatını aparıb.
