5 Mart – Bədən Tərbiyəsi və İdman Günü münasibətilə 2011-2012 və 2013-2014-cü il təvəllüdlü yeniyetmələr arasında boks idman növü üzrə Siyəzən rayon birinciliyi keçirilib.
Shimal.News xəbər verir ki, Quba-Xaçmaz Regional Gənclər və İdman İdarəsinin Siyəzən rayonu üzrə gənclər və idman sektorunun və Quba-Xaçmaz Regional Təhsil İdarəsinin nəzdində fəaliyyət göstərən Siyəzən rayon Uşaq Gənclər İdman-Şahmat Məktəbinin birgə təşkilatçılığı ilə keçirilən yarışda 50-ə yaxın yeniyetmə boksçu müxtəlif çəki dərəcələrində qüvvəsini sınayıb.
İki gün davam edən yarış boks idman növünün inkişaf etdirilməsi, bu idman növünə yeniyetmələrin marağının artırılması, perspektivli idmançıların aşkara çıxarılması, yeniyetmə boksçuların yarış təcrübəsinin artırılması, eləcə də sağlam həyat tərzinin təbliğ olunması məqsədi daşıyıb.
Yarışın təltif olunma mərasimində yer tutan boksçular Quba-Xaçmaz Regional Gənclər və İdman İdarəsinin müvafiq dərəcəli diplomları ilə mükafatlandırılıblar. Həmçinin yarışın keçirilməsində göstərdikləri dəstəyə görə boks üzrə məşqçi-müəllimlər Elman Abdullayev, Ramil Əsgərov və Şahin Kərimov Quba Xaçmaz Regional Gənclər və İdman İdarəsinin fəxri fərmanları ilə təltif olunublar.
