"Qarabağ"ın baş məşqçisi Qurban Qurbanovun ardınca "Şamaxı"nın baş məşqçisi Ayxan Abbasov da Quba Olimpiya İdman Kompleksinin stadionu ilə bağlı maraqlı iddia ilə çıxış edib.
Shimal.News məlumat verir ki, Misli Premyer Liqasının XXI turunda "İmişli" Qubada "Şamaxı"nı qəbul edib.
0:0 hesabı ilə başa çatan matçdan sonra Ayxan Abbasov bildirib ki, stadionunun qapıları normadan 11 sm hündür idi:
"Bu stadiona xeyrimiz oldu. Əvvəl bu stadionun qapıları normadan 11 sm hündür idi. Bu gün onu düzəltdilər".
Bundan öncə "Qarabağ"ın baş məşqçisi Qurban Qurbanov "İmişli"yə 1:0 hesab ilə qalib gəldikləri matçdan sonra meydançanın ot örtüyündə futbol oynamağa necə icazə verildiyini anlamadığını bildirmişdi.
