Monteneqronun paytaxtı Podqoritsada keçirilən cüdo üzrə gənclər arasında Avropa çempionatında Azərbaycan milli komandası 3 qızıl və 2 bürünc medal qazanıb.
Shimal.News xəbər verir ki, cüdoçularımız Vətənə qayıdıb. Onları Heydər Əliyev Beynəlxalq Aeroportunda idman ictimaiyyətinin nümayəndələri, federasiya rəsmiləri, media təmsilçiləri və yaxınları qarşılayıblar.
Ayxan Mirzəzadə (-60 kq), Məhəmməd Musayev (-66 kq) və Süleyman Şükürov (-90 kq) bütün rəqiblərinə qalib gələrək Avropa çempionu olublar. Davud Namazlı (-100 kq) və Ramazan Əhmədov (+100 kq) isə yarışda bürünc medal qazanıblar.
Azərbaycan millisi 44 ölkənin iştirak etdiyi çempionatı 3 qızıl və 2 bürünc medalla başa vuraraq ümumi komanda hesabında ikinci, oğlanlar arasında isə birinci yeri tutub.
Qeyd edək ki, çempionatın qaliblərindən biri də İsmayıllı rayonunun təmsilçisi Ayxan Mirzəzadə olub. O, finalda Fransanı təmsil edən Lüsyen Tiksyeni məğlub edərək qızıl medal qazanıb.
