Şamaxıda məktəb direktoruna hücum edən şəxs cinayət məsuliyyətinə cəlb olunub.
Hadisə rayonun Sabir qəsəbəsində A. Alxanov adına orta məktəbdə baş verib.
1982-ci il təvəllüdlü Elxan Ağayev həyat yoldaşı ilə birlikdə məktəbə gələrək direktor Gülnurə Babaşovaya hücum edib. İddiaya görə, o, direktorun kabinetini dağıdıb, marker qabını onun üzərinə ataraq baş nahiyəsindən xəsarət yetirib. Bundan başqa, məktəbdə yüksək səslə təhqiramiz ifadələr işlədərək tədris prosesini pozub.
Məlumata əsasən, hadisədən əvvəl Elxan Ağayev həyat yoldaşının məktəbdə texniki işçi kimi işə qəbul olunması üçün müxtəlif qurumlara müraciət edib. Lakin direktor onun aqressiv davranışları və pis vərdişləri ilə bağlı narahatlıqlarını əsas gətirərək həmin müraciəti müsbət qiymətləndirməyib. Bundan sonra Elxan Ağayevin məktəbə gələrək insident törətdiyi bildirilir.
Faktla bağlı Şamaxı Rayon Polis İdarəsində Cinayət Məcəlləsinin 221.3-cü (xuliqanlıq) maddəsi ilə cinayət işi başlanılıb və materiallar məhkəməyə göndərilib.
Məktəb direktoru məhkəmədən təqsirləndirilən şəxsə cəza verilməsini tələb etsə də, məhkəmə onun ilk dəfə cinayət törətməsini, azyaşlı övladlarının olmasını və digər yüngülləşdirici halları nəzərə alaraq sınaq müddəti təyin edilməklə şərti cəza verib.
Mənbə: Qafqazinfo.az
