Xəbər verdiyimiz kimi, Qusar rayonunun Hil kəndində dəhşətli qətl hadisəsi baş verib. Kənd sakini Asif Təyibov keçmiş həyat yoldaşı Diana Təyibovanı bıçaqlayaraq qətlə yetirib.
Shimal.News hadisənin bəzi təfərrüatlarını əldə edib.
Məlumata görə, cütlük təxminən üç il əvvəl boşanıb. Ayrılandan sonra Diana bir övladı ilə birlikdə ata evinə qayıdıb, digər iki övlad isə Asif ilə qalıb.
İddialara əsasən, Asif barışmaq bəhanəsi ilə keçmiş həyat yoldaşı ilə görüşüb. Qadına onun üçün kirayə ev tutacağını deyərək aldadıb və həmin ünvana aparıb. Orada Dianaya fiziki zorakılıq göstərən Asif onun əl-qolunu skoçla bağlayıb, bıçaqla baş və boğaz nahiyəsindən xəsarətlər yetirib. Daha sonra hadisə yerindən qaçıb.
Bir müddət itkin düşmüş hesab olunan qadının meyiti dünən polis əməkdaşları tərəfindən aşkar edilib. Cinayəti törətməkdə şübhəli bilinən Asif saxlanılıb.
Qeyd edək ki, Asif Hil kənd məktəbində bağban vəzifəsində çalışıb. Eləcə də o, kənddə tanınmış din xadimidir.
