Quba RMX-dan sərnişin avtobusu tərəfindən vurulan ana və övladı haqqında açıqlama:
18.12.2025-ci il tarixində saat 13:00 radələrində Quba rayonu ərazisində baş verən yol-nəqliyyat hadisəsi səbəbilə biri aqonal vəziyyətdə olmaqla, 2 nəfər (qadın) Quba Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
Onlara sol bazunun epifiziolizi, həyatla uzlaşmayan müştərək travma, aqonal vəziyyət diaqnozları təyin olunub və zəruri tibbi xidmətlər göstərilib.
Vəziyyəti qənaətbəxş qiymətləndirilən 2017-ci il təvəllüdlü şəxs ambulator müalicə üçün evə buraxılıb.
1998-cı il təvəllüdlü şəxsə göstərilən bütün zəruri reanimasiya tədbirlərinə və həkimlərin çoxsaylı səylərinə baxmayaraq, saat 13:20 radələrində pasiyentin bioloji ölüm faktı qeydə alınıb.
Meyit təşrih olunması üçün Məhkəmə-Tibbi Ekspertiza və Patoloji Anatomiya Birliyinin Quba rayon şöbəsinə təhvil verilib.
***
Quba şəhəri H. Əliyev prospektində ölümlə nəticələnən yol-nəqliyyat hadisəsi baş verib.
Shimal.News-un əldə etdiyi məlumata görə, bu gün səhər saat 1 radələrində tur avtobusu yolu keçmək istəyən ana və övladını vurub.
Ana 27 yaşlı Əminə Sahib qızı İsrafilova və qızı 8 yaşlı Şahbikə Gülyar qızı İsrafilova Təcili Tibbi Yardım maşını ilə Quba Rayon Mərkəzi Xəstəxanasına çatdırılıb.
Xəstəxanaya çatdırılan ananı həkimlərin bütün səylərinə baxmayaraq, xilas etmək mümkün olmayıb.
Bildirilir ki, onlar Qırmızı Qəsəbədə yaşayırlar, əslən isə Cimi kəndindəndirlər. Hadisədən öncə məhkəmədən çıxaraq bir qədər aralıda yolu keçmək istəyiblər.
Qeyd edək ki, qadının 5 yaşlı oğlu da var.
