Quba–Xaçmaz avtomobil yolunun Yergüc kəndi ərazisində yol-nəqliyyat hadisəsi baş verib.
Shimal.News-un əldə etdiyi məlumata görə, dünən axşam saatlarında "Opel" markalı avtomobil yolu keçən qoyun sürüsü ilə toqquşub.
Nəticədə 3 qoyun hadisə yerində ölüb, 4-ü isə müxtəlif dərəcəli xəsarətlər alıb. Mal-qaranın sahibinin həmin kəndin sakini olduğu bildirilir.
Hadisə yerinə Dövlət Yol Polisi əməkdaşları cəlb olunub. Qəza zamanı tərəflər arasında mübahisə yaranıb. Sürücü bildirib ki, avtomobil yolundan qoyun-quzunun keçməsi yolverilməzdir və bu zaman mütləq ehtiyat tədbirləri görülməlidir.
Heyvanların sahibi isə ərazinin yaşayış məntəqəsi olduğunu, bağ sahəsinin yolun o biri tərəfində, evinin isə bu tərəfində yerləşdiyini, heyvanları keçirmək üçün alternativ yolun olmadığını qeyd edib. O, qəzanın sürücünün yüksək sürəti səbəbindən baş verdiyini iddia edib.
Məlumata görə, heyvanların sahibi hadisədən sonra sürücüyə təxminən 1000–1500 manat məbləğində zərərin dəydiyini, tərəflərin razılaşa biləcəyini təklif edib. Lakin "Opel" markalı avtomobilin sürücüsü bu təkliflə razılaşmayaraq DYP əməkdaşlarını çağırıb.
Faktla bağlı araşdırma aparılır. Məsələyə sabah Xaçmaz Rayon Polis Şöbəsində aydınlıq gətiriləcəyi bildirilib.
