Xəbər verdiyimiz kimi Xaçmaz rayonunda 2023-cü ildə itkin düşən şəxsin qətlə yetirildiyi müəyyən olunub.
Shimal.News hadisə ilə bağlı bəzi detalları əldə edib.
Xaçmazın Qusarçay kənd sakini, 1987-ci il təvəllüdlü Əmirəddin Əkbərovun ov tüfəngi ilə qətlə yetirilməsində şübhəli bilinən 1975-ci il təvəllüdlü Surəddin Həsənəliyev saxlanılıb.
Məlumata görə, Ə.Əkbərov bir müddət əvvəl ailəsindən ayrılıb. Ona məxsus evdə isə müəyyən dövrlərdə Surəddin Həsənəliyev kirayəçi kimi yaşayıb və yaxın ərazilərdə usta fəaliyyəti ilə məşğul olub.
Kənd sakinlərinin sözlərinə görə, kirayəçi ev sahibinin taleyi ilə maraqlanan şəxslərə onun aliment borcları səbəbindən gizləndiyini deyib.
Aparılan araşdırmalar zamanı müəyyən edilib ki, Əmirəddin Əkbərov 3 il ərzində aliment ödəmədiyi üçün hüquq-mühafizə orqanları tərəfindən axtarışda olub. Əməliyyat tədbirləri nəticəsində onun kirayəçisi Surəddin Həsənəliyev tərəfindən ov tüfəngi ilə qətlə yetirildiyi və meyitinin evin həyətində basdırıldığı üzə çıxıb.
Qətli törədən izləri itirmək məqsədilə meyiti basdırdığı yerin üzərində it damı inşa edib.
Faktla bağlı cinayət işi başlanılıb, istintaq tədbirləri davam etdirilir.
