Quba-Xınalıq yolunda intensiv yağışlar yenidən fəsadlar törədib.
Avqustun 31-də yağan güclü yağışlar Qudyalçayda suyun səviyyəsini artırıb. Nəticədə yolun Quba istiqamətində olan hissəsinin sol çiyini yuyulub.
Quba 5 saylı Yol İstismar İdarəsinin əməkdaşları yolda nəqliyyat vasitələrinin təhlükəsiz hərəkətini təmin etmək məqsədilə ərazidə uzunluğu 5 metr, dərinliyi 1 metr 85 santimetr, eni isə 1 metr 20 santimetr olan istinad divarı inşa ediblər.
Məlumata görə, iyul ayında yolun 30-cu kilometrində baş vermiş sürüşmənin nəticələrini isə tam aradan qaldırmaq mümkün olmayıb.
Hündür massivdən qoparaq yola düşən ağır qaya parçasını hələ də ərazidən götürmək mümkün olmadığından həmin hissədə nəqliyyatın hərəkəti çətinləşib. Yol təsərrüfatı işçiləri yolda hərəkətin fasiləsizliyinə ciddi nəzarət edirlər.
Yağıntıların intensivləşməsi ilə fəsadların daha da artacağı istisna edilmir.
Mənbə: Bizim.Media
