Artıq 2025-ci ilin yekununa qısa zaman qalıb.
Bizim.media-nın məlumatına görə, ilin yekunlarına nəzər saldıqda, bu il çox sayda məmurun həbs edildiyini görə bilərik.
Bu il Şimalda həbs olunan məmurların ümumi siyahısını təqdim edirik:
Tural Məmmədov
Martın 13-də Şəki şəhər İcra Hakimiyyətinin sabiq şöbə müdiri Tural Məmmədovun haqqında məhkəmə tərəfindən həbs qətimkan tədbiri seçilib.
T. Məmmədov şəhid ailələrinə qarşı dələduzluqda şübhəli bilinərək polis tərəfindən saxlanılıb. Barəsində Cinayət Məcəlləsinin 178-ci (Dələduzluq) maddəsi ilə cinayət işi başlanıb.
Xaçmaz Gömrük İdarəsində əməliyyat
Hidayət Məmmədov və "Azərterminalkompleks" Birliyinin inspektoru Bayram Məmmədov həbs olunublar. Aparılan araşdırmalar onların əvvəlcədən razılaşaraq vəzifə səlahiyyətlərindən sui-istifadə edib, dərman və digər mallarla dolu yük avtomobilinin gömrük nəzarətindən kənar keçirilməsi üçün Arzu Abdullayevdən rüşvət aldıqlarını göstərib. İlkin sübutlara əsasən:
Hidayət Məmmədov qaçaqmalçılığa kömək, vəzifə səlahiyyətlərindən sui-istifadə və təkrar rüşvət alma maddələri ilə,
Bayram Məmmədov vəzifə səlahiyyətlərindən sui-istifadə və qrup halında rüşvət alma maddələri ilə, Arzu Abdullayev və Haysuf Hacıyev isə külli miqdarda dərman vasitələrinin qanunsuz dövriyyəsi və qaçaqmalçılıq maddələri ilə təqsirləndirilən şəxs qismində cəlb ediliblər.
Məhkəmə qərarına əsasən Hidayət Məmmədov, Bayram Məmmədov və Arzu Abdullayev barəsində həbs qətimkan tədbiri seçilib. Haysuf Hacıyev isə polisin nəzarəti altına verilib.
İslam Rzayev
31 oktyabrda Balakən Rayon İcra Hakimiyyətinin sabiq başçısı İslam Rzayev barəsində 4 ay müddətinə həbs qətimkan tədbiri seçilib. İslam Rzayev Cinayət Məcəlləsinin 179.3.2 (Külli miqdarda mənimsəmə) və 311.3.2 (təkrarən rüşvət alma) maddələri ilə ittiham olunur.
