Paytaxtın Sabunçu rayonunda 46 yaşlı kişi keçmiş həyat yoldaşına xəsarət yetirib.
Demokrat.az-ın məlumatına görə, Ağsu rayon sakini, 1980-ci il təvəllüdlü Tağı birgə yaşadıqları evdə keçmiş həyat yoldaşı Əsmərlə (adlar şərtidir - red.) mübahisə edib. Mübahisə zamanı o, qadının sifət nahiyəsinə zərbə vuraraq xəsarət yetirib.
Tağının sözlərinə görə, onlar 2005-ci ildə ailə qurublar və üç övladları var. Tərəflər 2021-ci ildə məhkəmə qərarı ilə boşansalar da, eyni evdə yaşamağa davam ediblər.
Təqsirləndirilən şəxs bildirib ki, hadisə günü qardaşının evinə elektrik xətti çəkməsinə icazə verib. Buna etiraz edən Əsmərlə aralarında mübahisə yaranıb və əsəbiləşərək ona əl qaldırıb.
Zərərçəkmiş Əsmər isə bildirib ki, əlavə çəkilən elektrik xəttinin evdəki ötürücünü yandırdığını və bunun yanğın təhlükəsi yaratdığını düşündüyü üçün etiraz edib. Onun sözlərinə görə, bu zaman Tağı ona hücum edərək sifət və baş nahiyəsinə zərbələr endirib.
Qadın əvvəlcə polisə müraciət etməsə də, sonradan ağrılar səbəbindən xəstəxanaya gedib və daha sonra şikayət ərizəsi yazıb.
Lakin məhkəmə zamanı tərəflərin barışdığı məlum olub. Əsmər keçmiş həyat yoldaşına qarşı şikayətinin olmadığını və onun cəzalandırılmasını istəmədiyini bildirib.
Sabunçu Rayon Məhkəməsinin qərarı ilə Tağı cinayət məsuliyyətindən azad edilib, cinayət işi üzrə icraata isə xitam verilib.
