Azərbaycan Xalq Cümhuriyyəti (AXC) müsəlman şərqində ilk parlamentli respublika olub. O 1918-ci ilin may ayının 28-də Azərbaycan Milli Şurasının İstiqlal Bəyannaməsi ilə yaranıb.
Cümhuriyyəti Məhəmməd Əmin Rəsulzadə, Fətəli Xan Xoyski, Əlimərdan bəy Topçubaşov, Camo bəy Hacınski, Nəsib bəy Yusifbəyli, Səməd bəy Mehmandarov, Əliağa Şıxlinski, Xudadat bəy Rəfibəyli və digər ziyalılar yaradıblar. Onların məqsədi müstəqil, azad, demokratik respublika qurmaq idi.
Həmin dövrdə ölkə sərhədləri müəyyənləşdirildi, ana dili dövlət dili elan edildi, ordu quruculuğu sahəsində tədbirlər həyata keçirildi, maarifin və mədəniyyətin inkişafına diqqət yetirildi. Həmçinin Azərbaycan qonşu xalqlar və dövlətlərlə dostluq münasibəti quracağını bəyan etdi. AXC millət, məzhəb, sinif və cins fərqi görmür və bütün vətəndaşların siyasi hüquqlarını təmin edirdi.
23 aydan sonra 1920-ci il aprelin 28-də bolşeviklərin 11-ci ordusu Azərbaycanı işğal etdi və respublika süquta uğradı.
Azərbaycan xalqı 1991-ci ildə öz dövlət müstəqilliyini bərpa etdikdən sonra AXC-nin ideyalarını davam etdirərək yeni müstəqil dövlətini yaratdı. Artıq 27 oktyabr 1992-ci ildən rəsmi şəkildə 28 May Respublika Günü kimi qeyd edilirdi.
15 oktyabr 2021-ci ildə Milli Məclisdə “Müstəqillik Günü haqqında” qanun layihəsi qəbul olundu və 28 May – Respublika Gününün adı dəyişdirilərək Müstəqillik Günü elan edildi.
