Azov dənizində yük gəmisinə pilotsuz uçuş aparatının hücumu nəticəsində həlak olan xaçmazlı kapitan Fuad Orucovla vida mərasimi keçirilir.
Shimal.News xəbər verir ki, mərasim Xaçmaz şəhərində mərhumun yaşadığı evdə təşkil olunub. Vida mərasiminə ailə üzvləri, yaxınları, rayon ictimaiyyətinin nümayəndələri və dənizçi həmkarları qatılıblar.
Fuad Orucov doğulduğu Yergüc kəndində torpağa tapşırılacaq.
Xatırladaq ki, iyunun 5-nə keçən gecə Azov dənizində göyərtəsində 25 azərbaycanlının olduğu iki xarici yük gəmisinə hücum edilib. Hadisə nəticəsində Şimaldan olan Xaçmaz rayon sakini, 45 yaşlı kapitan Fuad Orucov və Zaqatala rayonunun Aşağı Tala kənd sakini, 29 yaşlı Məhəmməd Əliyev həlak olublar.
Uzun illər dənizçilik sahəsində çalışan Fuad Orucov peşəkar kapitan kimi tanınıb. O, ailəli olub və dörd övlad atası idi.
