Xaçmaz şəhərində 20 Yanvar və Mustafa Kamal Atatürk küçələrinin kəsişməsində işıqforlar quraşdırılıb.
Shimal.News xəbər verir ki, sakinlər arasında "Bazar yolu" kimi tanınan bu ərazi son vaxtlar tez-tez baş verən yol-nəqliyyat hadisələri ilə gündəmə gəlirdi. Burada müxtəlif vaxtlarda bir neçə avtomobil qəzası qeydə alınmış, xəsarət alanlar olmuşdu.
Sürücülər yeni işıqforların quraşdırılmasını müsbət addım kimi qiymətləndirirlər. Onların fikrincə, bu yenilik yol hərəkətinin daha təhlükəsiz təşkilinə və qəzaların sayının azalmasına kömək edəcək.
Bununla yanaşı, sakinlər Xaçmazın digər küçələrində də yol nişanlarının yenilənməsinə, əlavə tənzimləyici vasitələrin quraşdırılmasına və bəzi ərazilərdə asfalt örtüyünün bərpasına ehtiyac olduğunu bildirirlər.
Qeyd edək ki, sözügedən kəsişmədə bundan əvvəl də bir neçə qəza baş verib. Onlardan birində "VAZ-21015" və "KIA" markalı avtomobillərin toqquşması nəticəsində 3 nəfər xəsarət almışdı. Başqa bir hadisədə isə "VAZ-2107" markalı avtomobil qarşıdan gələn nəqliyyat vasitəsinə yol vermədən hərəkətə başladığı üçün qəza baş vermişdi. Bu səbəbdən ərazi sürücülər tərəfindən riskli yol qovşaqlarından biri hesab olunurdu.
