Zaqatalada yerləşən Pəri Qalası məhv olmaq riski ilə üz-üzədir. İnsanlar tərəfindən divarların aşınması, yazıların həkk olunması və ümumi baxımsızlıq kimi faktların qeydə alınması abidəyə qarşı biganəlik və vandalizm təhlükəsi deməkdir.
Shimal.News-a müraciət edən vətəndaşlar bildirirlər ki, buna şahid olmaq üçün çətin relyefi dəf etməyə ehtiyac yoxdur. Ora tur təşkil edən şəxslərin sosial şəbəkələrdəki paylaşımlarını izləmək kifayətdir. Yayılan görüntülər bu unikal abidənin qorunması üçün ziyarətçi axınına nəzarətin yetərli olmadığını göstərir.
Məsələ ilə bağlı Mədəniyyət Nazirliyindən bildirilib ki, abidə sərt qayalıq ərazidə yerləşdiyi üçün ona birbaşa giriş mümkün deyil. Ziyarətçilərə onu yalnız müəyyən məsafədən izləmək tövsiyə olunur. Nazirlik yanında fəaliyyət göstərən Mədəni İrsin Qorunması, İnkişafı və Bərpası üzrə Dövlət Xidmətinin Qəbələ Regional İdarəsi tərəfindən ziyarətçilərlə maarifləndirici söhbətlərin aparıldığı və qanunvericiliyin tələblərinin izah edildiyi qeyd olunub.
Rəsmi açıqlamada abidə üzərində konkret vandalizm faktlarının qeydə alınmadığı bildirilsə də, yayılan görüntülər sübut edir ki, reallıqla qurumun mövqeyi arasında ziddiyət var.
Qeyd edək ki, tarixi abidələrin qorunması ilə bağlı qanunvericiliyin pozulması inzibati və cinayət məsuliyyəti yaradır.
Sakinlər və ictimaiyyət nümayəndələri isə məsələ ilə bağlı daha ciddi nəzarət tədbirlərinin görülməsini, qanun pozuntularına yol verən şəxslərin cəzalandırılmasını və tarixi irsin qorunması istiqamətində təcili müdaxilə tələb edir.
