Xızı rayonunun Qars kəndinin sakinləri illərdir bərbad vəziyyətdə olan yol səbəbindən ciddi çətinliklərlə üzləşdiklərini bildirirlər.
Onların sözlərinə görə, yağışlı havalarda kəndə giriş-çıxış demək olar ki, tamamilə mümkünsüz olur. Xəstə olduqda təcili tibbi yardım kəndə gələ bilmir, bəzən isə vəfat edən şəxslərin cənazəsini belə qəbiristanlığa aparmaq mümkün olmur. Avtomobillər isə tez-tez sıradan çıxırlar.
Kənd sakinlərinin sözlərinə görə, icra nümayəndəliyi bəzən yolu traktorla hamarlasa da, yağan ilk yağışdan sonra vəziyyət yenidən əvvəlki halına qayıdır.
Məsələ ilə bağlı Azərbaycan Avtomobil Yolları Dövlət Agentliyi bildirib ki, Xızı rayonunun Qars kəndinə gedən yol agentliyin balansındadır. Son intensiv yağışlar nəticəsində yolun bəzi hissələri yararsız vəziyyətə düşüb, əraziyə baxış keçirilib və bərpa işləri üçün təkliflər hazırlanaraq aidiyyəti üzrə təqdim edilib.
Agentlik hava şəraiti sabitləşdikdən sonra yaxın günlərdə əraziyə xüsusi texnikanın cəlb ediləcəyini və yolun bərpası istiqamətində işlərin aparılacağını açıqlayıb.
Maraqlıdır ki, çəkiliş başa çatdıqdan sonra jurnalistləri rayon mərkəzinə aparmalı olan avtomobil də palçıqda batıb və onun çıxarılması üçün ikinci avtomobilin köməyinə ehtiyac yaranıb. Bu mənzərə sakinlərin illərdir səsləndirdiyi problemlərin real vəziyyətini bir daha ortaya qoyub.
Mənbə: Baku TV
