Xaçmaz rayonunda elektrik təsərrüfatının yenilənməsi istiqamətində genişmiqyaslı işlər davam etdirilir.
Shimal.News xəbər verir ki, Prezident İlham Əliyevin tapşırıqlarına əsasən "Azərişıq" ASC tərəfindən həyata keçirilən yenidənqurma layihələri rayonun 20-yə yaxın kənd və qəsəbəsini əhatə edir.
Görülən işlər çərçivəsində Keymərəz kəndində 0,4 və 10 kV-luq elektrik xətləri və dayaqları yenilənib, Özünüdaşıyan İzolyasiyalı Naqillər çəkilib, yeni transformator məntəqəsi quraşdırılıb.
Hazırda Gödəkli, Bayoba, Köhnə Xaçmaz və Niyazoba kəndlərində də elektrik şəbəkəsinin yenilənməsi işləri davam edir. Xaçmaz Rayon İcra Hakimiyyətinin başçısı Elnur Rzayev Köhnə Xaçmaz və Niyazoba kəndlərində aparılan işlərlə yerində tanış olub.
Bundan əlavə, Xaçmaz şəhərinin Sabit Rəhman küçəsində və ətraf ərazilərdə də elektrik şəbəkəsi yenidən qurulur.
Məlumata görə, bu ilin sonunadək Şıxlar, Çaykənarı, Hacılar, Çaxmaqlı, Qaraçı, Əbilyataq, Nərəcan, Xanlıqoba, Xaspoladoba və Qarabağlı kəndlərində də elektrik təsərrüfatının tamamilə yenilənməsi planlaşdırılır.
Qeyd olunur ki, həyata keçirilən layihələrin əsas məqsədi abonentlərin fasiləsiz və keyfiyyətli elektrik enerjisi ilə təmin olunması, həmçinin enerji itkilərinin minimuma endirilməsidir.
