Xaçmaz rayonunun Çiləgir kəndində qarlı və şaxtalı hava fonunda təbiət sanki öz qaydalarını pozur.
Shimal.News-un məlumatına görə, kənd ərazisinə qar yağmasına baxmayaraq yerdən sıx buxar qalxır və ətrafda qeyri-adi mənzərə formalaşdırır.
Buxarlanmanın səbəbi yerin təkindən çıxan isti termal sudur. Soyuq hava ilə qaynar suyun təması nəticəsində arx boyunca ağ duman pərdəsini xatırladan buxar yaranır. Səhər saatlarında bu görüntü daha aydın müşahidə olunur — qarın üzərindən qalxan buxar sanki torpağın "isti nəfəsi" kimi görünür.
Çiləgirdə qar, şaxta və isti suyun bir araya gəldiyi bu mənzərə bölgənin qış portretinə fərqli çalar qatır.
