Son illərdə Azərbaycanda urbanizasiya prosesinin sürətlənməsi təhsil sahəsində də özünü göstərir. Şimal bölgəsində, o cümlədən İsmayıllıda bəzi kənd məktəblərində şagird sayının azalması səbəbindən siniflər birləşdirilir, bəziləri isə fəaliyyətini dayandırır.
2025–2026-cı tədris ilinin əvvəlində ölkədə fəaliyyət göstərən dövlət ümumtəhsil müəssisələrinin sayı 4160-a enib. Bu, əvvəlki illə müqayisədə 164 məktəb az deməkdir. Eyni zamanda, şagirdlərin sayı da 22 mindən çox azalıb.
İsmayıllı sakinləri bildirirlər ki, son illərdə bir sıra kənd məktəblərində siniflərin sayı xeyli azalıb. Onların sözlərinə görə, təkcə bu il rayonun müxtəlif kəndlərində beş məktəb bağlanıb, daha iki məktəbin bağlanacağı ilə bağlı məlumatlar dolaşır.
Valideynlər hesab edirlər ki, məktəblərin bağlanması ailələrin kənddən köçməsinə səbəb olur. Bəziləri isə maddi imkanlarının rayon mərkəzinə köçməyə və ya övladlarını uzaq məktəbə göndərməyə yol vermədiyini deyirlər.
Mütəxəssislərin fikrincə, əsas səbəblərdən biri daxili miqrasiyadır. İş, təhsil və daha yaxşı yaşayış şəraiti axtaran ailələr şəhərlərə üz tutduqca kəndlərdə əhali və şagird sayı azalır.
Ekspertlər qeyd edirlər ki, regionlarda yeni iş yerlərinin yaradılması, sosial infrastrukturun yaxşılaşdırılması və yaşayış şəraitinin yüksəldilməsi bu tendensiyanın qarşısının alınmasına kömək edə bilər. Onların fikrincə, məktəblərin fəaliyyəti yalnız təhsil baxımından deyil, kəndlərin sosial həyatının qorunması üçün də böyük əhəmiyyət daşıyır.
Mənbə: Xezerxeber.az
