Bu gün Vətən müharibəsi şəhidi, Quba rayonunun Ağbil kənd sakini Battal Bayraqdarovun doğum günüdür.
Shimal.New xəbər verir ki, Battal Bayraqdarov 2002-ci ildə Ahıska türkü ailəsində dünyaya gəlib. Uşaqlıqdan idmana marağı ilə seçilən Battal cüdo üzrə bir sıra turnirlərin qalibi olub. Orta məktəbi bitirdikdən sonra Türkiyədə ali təhsil almaq imkanı qazansa da, atasının səhhəti ilə bağlı bu arzusunu reallaşdıra bilməyib.
2020-ci il sentyabrın 27-də başlanan Vətən müharibəsində Azərbaycan Ordusunun əsgəri kimi döyüşlərə qatılan Battal Bayraqdarov Cəbrayıl və Füzuli istiqamətlərində gedən döyüşlərdə fəal iştirak edib. O, oktyabrın 12-də artilleriya atəşi nəticəsində şəhid olub və Quba rayonunda torpağa tapşırılıb.
Göstərdiyi şücaətə görə Battal Bayraqdarov ölümündən sonra "Vətən uğrunda", "Füzulinin azad olunmasına görə", "İgidliyə görə" və "Cəsur döyüşçü" medalları ilə təltif edilib.
Ailə üzvlərinin sözlərinə görə, Battal mərd, qorxmaz və vətənpərvər gənc kimi tanınıb. O, hər zaman ön cəbhədə olmağı ilə seçilib və döyüş yoldaşlarının hörmətini qazanıb.
Şəhidin xatirəsi onu tanıyanların qəlbində daim yaşayır.
