Quba-Şabran avtobusunda təhlükəsizlik kameralarının olmaması narazılığa səbəb olub.
Shimal.News xəbər verir ki, sakinlərin iddialarına görə marşrut avtobuslarında vəziyyət acınacaqlıdır. Belə ki, avtobuslarda təhlükəsizlik kameralarının və işıqlandırılmanın olmamasından bəzi gənclər sui-istifadə edirlər. Avtobuslarda yaşanan açıq “sevgi”, əxlaqa zidd hərəkətlər vətəndaşları narahat edir.
“Hər gün bu marşrutdan istifadə edirəm. Gördüyüm mənzərələr çox iyrəncdir. Unutmayaq ki, avtobuslardan uşaqlar, qocalar və s. istifadə edir. Gələcək nəsillərin tərbiyəsindən çox narahatıq. Aidiyyəti qurumlardan avtobusların kameralarla təchiz olunmasını və işıqlandırılmasını tələb edirik”, - deyə sərnişin F.Məmmədov qeyd edib.
Shimal.News məsələ ilə bağlı Azərbaycan Yerüstü Nəqliyyat Agentliyinə (AYNA) sorğu ünvanlayıb.
Cavab olaraq Agentliyin mətbuat katibi Pərvanə Əliyeva bildirib ki, müntəzəm sərnişin daşımalarında istifadə olunan avtonəqliyyat vasitələrinin texniki göstəricilərinə dair tələblərə əsasən avtonəqliyyat vasitələri bütün salonu əhatə edən və qeydə aldığı məlumatları ən azı 15 gün saxlaya bilən yaddaş qurğusuna malik videokameralar ilə təchiz edilməlidir: “Həmçinin avtonəqliyyat vasitələrinin salonunda sürücünün görməsinə maneə yaratmamaq şərtilə salonu işıqlandıran işıqlar olmalıdır. Sutkanın qaranlıq vaxtı sərnişin daşınarkən, həmin işıqlar yandırılmalıdır”.
O vurğulayıb ki, Şabran-Quba marşrutunun müvəqqəti istismarçısına mövcud çatışmazlıqları aradan qaldırması ilə bağlı xəbərdarlıq edilib.
