Şabran rayonunda, Dəvəçiçayın üzərində yerləşən körpü bir müddət əvvəl baş verən sel nəticəsində tamamilə yuyulub və istifadəyə yararsız hala düşüb. Buna baxmayaraq, aidiyyəti qurumlar tərəfindən ərazidə heç bir bərpa və ya təhlükəsizlik tədbiri görülməyib. Nəticədə ərazi nəinki avtomobil sürücüləri, hətta piyadalar üçün də həyati təhlükə mənbəyinə çevrilib.
Shimal.News-a müraciət edən yerli sakinlərin sözlərinə görə, körpünün təhlükəli vəziyyətdə olduğu dəfələrlə aidiyyəti orqanların diqqətinə çatdırılsa da, bu günə qədər heç bir addım atılmayıb. Ən acınacaqlısı isə odur ki, qəzalı körpü barədə nə xəbərdaredici lövhə, nə də hərəkətə məhdudiyyət gətirən hər hansı işarə qoyulub.
Ötən gün bir avtomobil sözügedən körpüdən keçmək istəyərkən çaya aşıb. Xoşbəxtlikdən hadisə zamanı insan itkisi olmayıb, lakin bu hadisə, təhlükənin nə qədər real və yaxın olduğunu bir daha göstərir.
