Qusar rayonunda güclü yağışların yaratdığı fəsadların aradan qaldırılması istiqamətində işlər davam etdirilir.
Shimal.New xəbər verir ki, aprelin 4-dən etibarən müşahidə olunan intensiv yağıntılar rayonun bir sıra yaşayış məntəqələrində ciddi problemlərə səbəb olub. Mövcud vəziyyətin nəzarətə götürülməsi, risklərin azaldılması və əhalinin təhlükəsizliyinin təmin olunması məqsədilə Qusar Rayon İcra Hakimiyyəti və aidiyyəti qurumlar tərəfindən zəruri tədbirlər həyata keçirilir. Ərazilərə xüsusi texnika və canlı qüvvə cəlb olunub, selin yaratdığı fəsadların aradan qaldırılması istiqamətində işlər görülür.
Aprelin 6-da Qusar Rayon İcra Hakimiyyətinin başçısı Sahir Məmmədxanov, Milli Məclisin deputatı Azər Badamov, hüquq-mühafizə orqanlarının rəhbərləri və digər məsul şəxslər vəziyyətlə yerində tanış olmaq üçün rayonun Çiləgir, Kuzun, Cağar, Əniq, Hil və Yasab kəndlərində olublar.
Baxış zamanı Çiləgir kəndində sel sularının gətirdiyi lil kütlələrinin toplandığı ərazilər, Kuzun kəndində su basmış fərdi yaşayış evi, məktəbin sinif otaqları və idman zalı, həmçinin kəndin əsas və daxili yolları nəzərdən keçirilib. Cağar kəndində sürüşmə riski olan sahələrə baxış keçirilib, Kuzun kəndinə gedən yolun bərpası ilə bağlı yerində müzakirələr aparılıb. Hazırda həmin istiqamətdə yolun lil və çöküntülərdən təmizlənməsi və nəqliyyatın fasiləsiz hərəkətinin təmin olunması istiqamətində işlər davam edir.
Yasab kəndinə gedən və tamamilə yararsız vəziyyətə düşmüş avtomobil yoluna baxış zamanı Azərbaycan Avtomobil Yolları Dövlət Agentliyinin sədr müavini Əvəz Qocayev də iştirak edib. Yolun mövcud vəziyyəti qiymətləndirilib və bərpası ilə bağlı görüləcək tədbirlər müzakirə olunub.
Daha sonra rəsmilər sel sularına düşərək həyatını itirən Farik Fərid oğlu Rəsulovun dəfn mərasimində də iştirak ediblər. Mərhumun ailəsinə və yaxınlarına başsağlığı verilib.
