Polisdən Qusarçay yatağındakı qanunsuzluqla bağlı AÇIQLAMA
DİN Mətbuat Xidmətinin Quba regional qrupundan bildirilib ki, Xaçmaz rayon Qusarçay kəndi ərazisində çay yatağından qanunsuz qum-çınqıl daşınması ilə bağlı yayılan video görüntülərlə əlaqədar polis əməkdaşları tərəfindən araşdırma aparılır.
Aidiyyəti qurumlarla birgə müvafiq tədbirlər görülür.
***
Qusarçay yatağından qum-çınqıl qarışığının qanunsuz götürülməsi qeydə alınıb.
Shimal.News-a daxil olan məlumata görə, Qusarçay yatağından 50–60 yük avtomobili həcmində qum-çınqıl qarışığı qazılaraq daşınıb.
İddia olunur ki, hadisə yanvar ayının ortalarında Xaçmaz rayonunun Ağtala kəndi ərazisində baş verib. Buna baxmayaraq, müvafiq qurumlar tərəfindən uzun müddət heç bir araşdırma aparılmaması sakinlərdə suallar doğurur.
Məlumata görə, sözügedən hasilat bələdiyyə və icra nümayəndəliyində çalışan şəxslərin iştirakı ilə həyata keçirilib.
Sakinlərin bildirdiyinə görə, daş karxanalarından 1 yük avtomobili çınqıl 100 manata satıldığı halda, Qusarçay yatağından çıxarılan çınqıl bir neçə müştəriyə 60 manata satılıb.
Vətəndaşlar ümid edirlər ki, müvafiq qurumlar vaxtında tədbir görərək mümkün ekoloji fəlakətin qarşısını alacaqlar.
Qeyd edək ki, oxşar hal bir müddət əvvəl də adıçəkilən kənd ərazisində baş verib. Həmin vaxt sakinlər Ekologiya və Təbii Sərvətlər Nazirliyinə müraciət edərək Qusarçay yatağından 80-dən çox yük avtomobili ilə qum-çınqıl hasilatının qanuniliyinin araşdırılmasını xahiş ediblər.
Araşdırmalar nəticəsində Xaçmaz Su Meliorasiya Sistemlərinin İstismarı İdarəsinin "Sahil" Sudan İstifadə Edənlər Birliyinin sədri Akif Allahqulu oğlu Babayev tərəfindən 30 kubmetr həcmində qum-çınqıl qarışığının qanunsuz şəkildə götürüldüyü müəyyən edilib. Faktla bağlı akt və protokol tərtib olunub, həmin şəxs barəsində cərimə tətbiq edilib.
Shimal.News mövzunu diqqətdə saxlayır.
