Quba rayonunun Alıc, Yuxarı Digah və Ərməki kəndlərinə gedən avtomobil yolunun bərbad vəziyyətdə olması sakinlərin narazılığına səbəb olub.
Shimal.News-a danışan sakinlərin sözlərinə görə, yol torpaq və iri daş qatından ibarətdir. Yolda yaranmış dərin çalalar, ətrafa səpələnmiş iri daşlar nəqliyyat vasitələrinin hərəkətini xeyli çətinləşdirir. Xüsusilə minik avtomobilləri bu yolda aşağı sürətlə və çətinliklə hərəkət edə bilir.
Sakinlər bildirirlər ki, yolun asfaltlanması ilə bağlı dəfələrlə aidiyyəti qurumlara müraciət edilsə də, indiyədək problem həllini tapmayıb.
Onlar qeyd edirlər ki, hərəkət zamanı qalxan toz həm sürücülər, həm də piyadalar üçün əlavə narahatlıq yaradır. Sakinlər yolun qısa müddətdə əsaslı təmir olunaraq asfaltlanmasını istəyirlər.
