Bu gün Vətən müharibəsi şəhidi Mehdi Muxtar oğlu Murtuzovun doğum günüdür.
1997-ci il iyulun 10-da Quba rayonunun Alpan kəndində anadan olan Mehdi Murtuzov uşaqlıqdan hərbçi olmağı arzulayırdı. Məktəb və peşə təhsilini başa vurduqdan sonra doğum günündə hərbi xidmətə yollanan Mehdi xidmət etdiyi müddətdə Aprel döyüşlərinin iştirakçısı olub, nümunəvi xidmətinə görə dəfələrlə təltif edilib.
Hərbi xidmətdən tərxis olunsa da, Vətənə xidmət sevgisi onu yenidən Ordu sıralarına qaytarıb. 2020-ci ilin əvvəlində müddətdən artıq həqiqi hərbi xidmət qulluqçusu (MAXE) kimi xidmətə başlayan Mehdi Murtuzov Vətən müharibəsinin ilk günlərindən döyüşlərə qatılıb.
Döyüş zamanı yaralansa da, müalicədən imtina edərək yenidən ön cəbhəyə qayıdıb. O, 2020-ci il oktyabrın 2-də Murovdağ-Kəlbəcər istiqamətində gedən ağır döyüşlər zamanı snayper atəşi nəticəsində şəhidlik zirvəsinə ucalıb. Qızğın döyüşlər səbəbindən nəşi yalnız Zəfərdən sonra tapılaraq doğulduğu Alpan kəndində torpağa tapşırılıb.
Prezident İlham Əliyevin sərəncamları ilə Mehdi Murtuzov ölümündən sonra "Vətən uğrunda", "İgidliyə görə", "Kəlbəcərin azad olunmasına görə" medalları, eləcə də 3-cü dərəcəli "Vətənə xidmətə görə" ordeni ilə təltif edilib.
Əziz xatirəsi xalqımızın qəlbində daim yaşayacaq. Allah bütün şəhidlərimizə rəhmət eləsin.
