Son dəfə yağan intensiv yağışlar Quba rayonunda infrastruktur problemlərini yenidən qabardıb.
Sakinlərin Shimal.News-a verdiyi məlumata görə, bir sıra ərazilərdə bağlar, yollar və yaşayış evləri su altında qalıb. Onların sözlərinə görə, bəzi hallarda bu problemlərin qarşısını almaq üçün sadəcə kanalizasiya xətlərinin və su arxlarının vaxtında təmizlənməsi kifayət edərdi.
Məsələn, Sovxoz 11 adlanan ərazidə (çörək sexinin qarşısında) yolun altında yerləşən kollektorların uzun müddətdir lil və palçıqla tutulduğu bildirilir. Sakinlər qeyd edirlər ki, dəfələrlə suvarma idarəsinə müraciət etsələr də, problemlər vaxtında aradan qaldırılmayıb. Yalnız son iki dəfə evlər su altında qaldıqdan sonra qismən təmizlik işləri aparılıb, lakin kollektorlar hələ də yararsız vəziyyətdədir.
Sakinlər yaranmış vəziyyətlə bağlı aidiyyəti qurumlara çağırış edərək, profilaktik tədbirlərin gücləndirilməsini, kanalizasiya və drenaj sistemlərinin tam şəkildə təmizlənməsini tələb edirlər. Onlar bildirirlər ki, gözlənilən növbəti yağıntılar eyni problemlərin təkrarlanmasına səbəb ola bilər.
Qeyd olunur ki, oxşar hallar rayonun digər ərazilərində də müşahidə olunur və vətəndaşlar problemin köklü şəkildə həllini istəyirlər.
