Quba şəhərinin 29-cu kvartal adlanan ərazisində sahibsiz itlərin yaratdığı təhlükə kritik vəziyyətə çatıb.
Shimal.News-a verilən məlumata görə, itlər son günlərdə bir neçə nəfərə hücum edib. Sakinlərin sözlərinə görə, heyvanlar əsasən yaşlı insanların üzərinə cumur və onları dişləyir.
Ərazidə yaşayanların bildirdiyinə görə, bu gün yaşlı qadın iki itin hücumuna məruz qalıb. Qonşuların müdaxiləsi nəticəsində onu xilas etmək mümkün olub. Dünən isə digər yaşlı kişi ayaq nahiyəsindən xəsarət alıb və əraziyə təcili tibbi yardım briqadası cəlb edilib.
Sakinlər deyirlər ki, burada artıq 20-dən çox insana xəsarət yetirilib.
Bildirilib ki, ərazidə yerləşən 3 mərtəbəli binanın arxasında məskunlaşan itlərin sayı getdikcə artır. Heyvanlar bir neçə dəfə toplanaraq başqa əraziyə aparılsa da, yenidən geri qayıdıblar.
Mütəxəssislər isə problemin yalnız heyvanların uzaqlaşdırılması ilə həll olunmadığını bildirirlər. Onların fikrincə, sahibsiz heyvanlarla bağlı humanist və davamlı yanaşmalar tətbiq edilməlidir. Qeyd olunur ki, heyvanların qeydiyyatı, peyvəndlənməsi, yeni sığınacaqların yaradılması həm insanların təhlükəsizliyi, həm də heyvanların qorunması baxımından vacibdir.
Sakinlər aidiyyəti qurumlardan təcili tədbir görülməsini və ərazidə yaranmış təhlükənin aradan qaldırılmasını tələb edirlər.
