Qubanın II Nügədi kəndi ərazisində inşa olunan körpü elə bil sadəcə görüntü üçün tikilib.
Bu barədə Shimal.News-a məlumat verən sakinlər bildiriblər ki, Quba-Qonaqkənd-Muçu avtomobil yolu üzərində yerləşən və 30-dan çox kəndi birləşdirən körpü keyfiyyətsiz şəkildə təhvil verilib.
Tamamlama işlərinin başa çatdırıldığı bildirilsə də, piyadalar üçün körpüdən çıxan yol təhlükəli uçuruma aparır. Eyni zamanda körpüyə bitişən hissədə gediş-gəliş təmin olunmayıb. Dövlət əhəmiyyətli obyektlərin yerləşdiyi istiqamətə dönən yol çox dardır. İri nəqliyyat vasitəsi döngəyə daxil olanda qəza şəraiti yaratmamaq və qəzaya düşməmək qeyri-mümkün olacaq.
Yerli sakinlər şikayətlərinə belə davam ediblər:
“İşin icrasına cavabdeh şəxslərə tikinti zamanı dəfələrlə bu məsələlərlə bağlı müraciət etmişik. Amma onlar məhəl qoymadılar, son xətlənməni edib çıxıb getdilər”.
Vətəndaşlar aidiyyəti qurumlardan təhlükəsizlik üçün təcili tədbir görülməsini tələb edirlər.
Shimal.News məsələni diqqətdə saxlayır. Cavabdeh qurumların mövqeyini və ya gördükləri tədbir barədə məlumatı dərc etməyə hazırıq.
View this post on Instagram
