Qubanın Qəçrəş kəndində ağacların kəsilməsi ilə bağlı polis araşdırmaya başlayıb.
Daxil olan məlumat əsasında ərazidə çəkiliş aparılıb, çoxsaylı ağacların kəsildiyi müşahidə olunub. Bəzi hissələrdə meşə örtüyünün seyrəldiyi qeydə alınıb.
Sakinlər bildirirlər ki, əvvəllər sıx meşəlik olan ərazinin görünüşü ağacların kəsilməsindən sonra dəyişib. Onların sözlərinə görə, burada meyvə ağacları da olub.
Ərazinin sahibi Kamil Güləliyev isə bildirib ki, torpaq onun şəxsi mülkiyyətidir və çıxarışı var. Onun sözlərinə görə, ərazidə meyvə ağacları olub. Ağaclar ev tikmək məqsədilə kəsilib.
Ekologiya və Təbii Sərvətlər Nazirliyindən bildirilib ki, Quba-Qəçrəş yolunun Qudyalçay sahilində ağacların kəsilməsi faktı regional qurumların əməkdaşları tərəfindən aşkarlanıb. Müəyyən edilib ki, ərazi meşə fonduna aid deyil və seyrək ərazidir.
DİN-in Quba regional qrupundan isə bildirilib ki, faktla bağlı Quba Rayon Polis Şöbəsində prosessual araşdırmaya başlanılıb.
Araşdırmanın nəticəsindən asılı olaraq hadisəyə hüquqi qiymət veriləcək.
Mənbə: Xezerxeber.az
