Quba-Xaçmaz avtomobil yolunun bir hissəsində sürət həddi 60 km/saatdan 50 km/saata endirilib.
Shimal.News xəbər verir ki, son günlər bölgədə yol nişanlarının yenilənməsi prosesi çərçivəsində yeni sürət məhdudiyyəti tətbiq olunub.
Məlumata görə, yeni nişan Quba-Xaçmaz yolunda, Xaçmaz istiqamətindən hərəkət edərkən Bəhrəli qəsəbəsinin (keçmiş Timiryazev) ərazisində yerləşdirilib. Məhdudiyyət avtobus dayanacağının yaxınlığından başlayaraq Quba şəhərinin girişindəki dairəyədək təxminən 2 kilometrlik hissəni əhatə edir.
Qeyd edək ki, indiyədək Quba-Xaçmaz yolunda yaşayış məntəqələri daxilində maksimal sürət həddi 60 km/saat, yaşayış məntəqələrindən kənarda isə 90 km/saat olub. Bu səbəbdən sürət həddinin 50 km/saata endirilməsi sürücülərdə "niyə" sualını doğurub.
Sürücülər bildirirlər ki, adətən belə məhdudiyyətlər piyada keçidlərinin, məktəblərin və ya qəza riskinin yüksək olduğu ərazilərin yaxınlığında tətbiq edilir. Yeni sürət həddinin tətbiq olunduğu hissədə isə xüsusi təhlükə mənbəyinin görünmədiyi qeyd olunur.
Mütəxəssislər sürücülərə yeni nişanlara diqqətlə yanaşmağı tövsiyə edirlər. Çünki uzun illər 60 km/saat sürət həddinə öyrəşən sürücülər yeni tələbi nəzərə almadıqda radara düşərək inzibati məsuliyyətlə üzləşə bilərlər. Hazırda ərazidə yol nişanlarının yenilənməsi işləri davam edir.
