Quba şəhərində eyni ərazidə son 15 gündə 4 yol nəqliyyat hadisəsi baş verib.
Bu barədə Shimal.News-a yerli sakinlər bildiriblər.
Onlar qeyd ediblər ki, Rəşad Quliyev küçəsi ilə kəsişən Xətai, Azərbaycan, Fətəli Xan küçələrində yol nişanları olmadığından qəzalar baş verir. Nəticədə avtomobillərdən savayı, fərdi yaşayış evlərinə də ziyan dəyir. Bununla yanaşı, qəza zamanı xəsarət alanlar da var.
Yaxınlıqda məktəb olduğuna görə, şagirdlər bu kəsişmədən keçirlər. Hər bir qəzanın ağır nəticəsi ola bilər. Ona görə də, qısa zamanda yol kəsişmələrinə müvafiq nişanlar yerləşdirilməlidir.
Vətəndaşlar həmçinin Quba şəhərinin digər bir çox küçəsində də eyni vəziyyətin olduğunu vurğulayıblar.
Xatırladaq ki, dövlət başçısının 13 mart 2024-cü il tarixli fərmanına əsasən, ölkə yollarında nişanların quraşdırılması səlahiyyəti artıq Azərbaycan Yerüstü Nəqliyyat Agentliyinə həvalə olunub.
