Quba-Xaçmaz avtomobil yolunun Quba rayonunun Bəhrəli (Timiryazev) kəndindən keçən hissəsində yol-nəqliyyat hadisəsi baş verib.
Shimal.News-un əldə etdiyi məlumata görə, yolu keçmək istəyən məktəbli "Opel" markalı avtomobilin vurması nəticəsində xəsarət alıb.
Məlumata görə, hadisə bu gün saat 12:00 radələrində qeydə alınıb. Qəzada 2013-cü il təvəllüdlü, Alekseyevka kənd tam orta məktəbinin 8-ci sinif şagirdi Gülay Şöhrət qızı Pirmuradova zərər çəkib. O, evdən çıxıb dərsə getdiyi zaman qəzaya uğrayıb.
Qəzadan sonra sürücü məktəblini Quba Rayon Mərkəzi Xəstəxanasının təcili yardım şöbəsinə çatdırıb. Şagird dərhal reanimasiya şöbəsinə yerləşdirilib. Onun vəziyyətinin çox ağır olduğu bildirilir. Ilkin məlumata görə, uşaqda kəllə-beyin travması və beyin toxumasında zədələnmə müşahidə edilir.
Hadisə yerinə hüquq-mühafizə orqanlarının əməkdaşları gəliblər. Faktla bağlı araşdırma aparılır.
Qəza ilə bağlı Shimal.News-un sorğusuna cavab olaraq TƏBİB-dən bildirilib ki, 30.09.2026-cı il tarixində saat 12:20 radələrində 2013-cü il təvəllüdlü şəxs (qadın) Quba Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
"Ona açıq kəllə-beyin travması, baş-beynin əzilməsi, döş qəfəsinin kontuziyası, qarın boşluğunun küt travması diaqnozu təyin olunub və zəruri tibbi yardım göstərilib.
Vəziyyəti ağır qiymətləndirilən pasiyentin müalicəsi Reanimasiya şöbəsində davam etdirilir".
