Bu gün Vətən müharibəsi şəhidi Elşən Əhmədlinin doğum günüdür.
Elşən Əhmədli 11 iyul 1997-ci ildə Oğuz rayonunda anadan olub. Təhsilini Oğuz şəhərində başa vurduqdan sonra Azərbaycan Texniki Universitetinin Nəqliyyat və Logistika fakültəsində ali təhsil alıb. Onu tanıyanlar Elşəni mehriban, səmimi və vətənpərvər bir gənc kimi xatırlayırlar.
2019-cu ildə müddətli həqiqi hərbi xidmətə çağırılan Elşən Əhmədli Cəlilabad rayonunda yerləşən Xüsusi Təyinatlı Qüvvələrdə xidmət edib. Xidmətini uğurla başa vursa da, Vətən müharibəsi başlayan günlərdə yenidən silaha sarılaraq Azərbaycanın ərazi bütövlüyü uğrunda döyüşlərə qatılıb.
Snayperçi kimi Füzuli istiqamətində gedən ağır döyüşlərdə, daha sonra isə Şuşanın azadlığı uğrunda həlledici əməliyyatlarda böyük şücaət göstərən Elşən Əhmədli 2020-ci il noyabrın 7-də qəhrəmancasına şəhid olub.
Şəhidimiz noyabrın 17-də doğma Oğuz rayonunun Şəhidlər xiyabanında dəfn edilib.
Azərbaycan Prezidenti İlham Əliyevin sərəncamları ilə Elşən Əhmədli ölümündən sonra "Vətən uğrunda", "Cəsur döyüşçü", "Şuşanın azad olunmasına görə" medalları, həmçinin 3-cü dərəcəli "Vətənə xidmətə görə" ordeni ilə təltif edilib.
Onun xatirəsi Oğuz rayonunda daim ehtiramla anılır. Şəhid Elşən Əhmədlinin adını yaşatmaq məqsədilə yaşadığı məhəllədə digər şəhid Fərid Zaməddinovla birlikdə Qoşa Şəhid Bulağı inşa edilib, həmçinin Oğuz şəhərindəki küçələrdən birinə onun adı verilib.
Əziz xatirəsi xalqımızın qəlbində əbədi yaşayacaq. Allah bütün şəhidlərimizə rəhmət eləsin!
