Oğuz rayonunun Xaçmaz kəndində Vətən Müharibəsi Qəhrəmanı Nail Nəriman oğlu İbrahimlinin doğum günü münasibətilə anım tədbiri keçirilib.
Shimal.News xəbər verir ki, əvvəlcə tədbir iştirakçıları Xaçmaz kənd Şəhidlər Xiyabanını ziyarət ediblər. Şəhidin məzarı önünə gül dəstələri düzülüb, şəhidlərin ruhuna dualar oxunub.
Daha sonra tədbir Xaçmaz kəndi M.F.Axundzadə adına 1 nömrəli tam orta məktəbin akt zalında davam etdirilib. Burada şəhidin əziz xatirəsinə həsr olunmuş "Bu dağların Naili" adlı kitabın təqdimatı keçirilib.
Tədbiri giriş sözü ilə açan kitabın müəllifi Vüsal Oğuz nəşrin hazırlanma məqsədi barədə məlumat verib. O bildirib ki, kitabda Nail İbrahimlinin həyat və döyüş yolu, eləcə də onu tanıyan insanların xatirələri yer alıb.
Təqdimat mərasimində çıxış edənlər Vətən Müharibəsi Qəhrəmanının keçdiyi şərəfli döyüş yolundan danışaraq onun göstərdiyi igidliyin gənc nəsil üçün nümunə olduğunu vurğulayıblar.
Şəhidin valideynləri isə onlara göstərilən diqqət və qayğıya görə Azərbaycan Prezidenti, Silahlı Qüvvələrin Ali Baş Komandanı İlham Əliyevə və Birinci vitse-prezident Mehriban Əliyevaya minnətdarlıqlarını ifadə ediblər.
Tədbirin sonunda şəhidin həyat və döyüş yolunu əks etdirən xatirələr bölüşülüb.
