Muğanlı-İsmayıllı istiqamətində tikinti ilə əlaqədar salınmış müvəqqəti xidməti yolda sürüşmələr baş verib. Bu haqda 30 iyun tarixində ShimalNews Azərbaycan Avtomobil Yolları Dövlət Agentliyinə (AYDA) istinadən məlumat verir.
Sürüşmələr avtomobil yolunun 2-ci km-də aparılan tikinti işləri ilə əlaqədar salınmış müvəqqəti xidməti yolda qeydə alınıb. Əraziyə AYDA-nın xüsusi texnikaları və canlı qüvvəsi səfərbər olunub.
Muğanlıdan İsmayıllı və əks-istiqamətdə bir neçə saatlıq avtonəqliyyat vasitələrinin hərəkəti məhdudlaşdırılıb, sürücülər alternativ olaraq, Bakı-Şamaxı-Yevlax avtomobil yoluna (Ağsu aşırımı) yönəldilib.
Sözügedən ərazidə səhər saatlarında avtonəqliyyat vasitələrinin hərəkəti qismən bərpa olunub. Ərazidə sürüşmənin fəsadlarının tam aradan qaldırılması istiqamətində işlər aparılır.
