Xaçmaz rayonunun Köhnə Xaçmaz kənd sakinləri bir həftəyə yaxındır davam edən elektrik enerjisi problemi ilə üzləşdiklərini bildirirlər.
Shimal.News-a daxil olan müraciətlərdə qeyd olunur ki, kəndin bir hissəsində elektrik xətləri ilə bağlı yaranmış nasazlıq hələ də aradan qaldırılmayıb. Sakinlərin sözlərinə görə, gün ərzində elektrik enerjisi ya ümumiyyətlə verilmir, ya da yalnız bir neçə saat aşağı gərginliklə təmin olunur.
İddia olunur ki, zəif gərginlik səbəbindən su nasosları işləmədiyi üçün kənddə su təchizatında da problemlər yaranıb, bəzi nasoslar isə sıradan çıxıb. Elektrik enerjisinin qeyri-sabit verilməsi nəticəsində soyuducuların işləmədiyi, internet xidmətində fasilələrin yarandığı, eləcə də bir sıra məişət avadanlıqlarının zədələndiyi bildirilir. Sakinlər ərzaqlarının xarab olduğunu və məişət ehtiyaclarını ödəmək üçün bulaqlardan su daşımağa məcbur qaldıqlarını deyirlər.
Onların sözlərinə görə, məsələ ilə bağlı dəfələrlə "Azərişıq" ASC-yə müraciət olunsa da, problem hələ də həllini tapmayıb.
Məsələ ilə bağlı "Azərişıq" ASC-yə sorğu ünvanlasaq da, sorğumuza hələlik cavab verilməyib.
