Qusar rayonunun Hiloba kəndində keçirilən səyyar qəbul zamanı icra başçısı Sahir Məmmədxanov kənd sakinləri ilə görüşüb.
Shimal.News xəbər verir ki, görüşdə Qusar Rayon İcra Hakimiyyəti Aparatının məsul əməkdaşları, hüquq-mühafizə orqanlarının, idarə və müəssisələrin rəhbərləri, eləcə də kənd sakinləri iştirak ediblər.
Sahir Məmmədxanov çıxışında bildirib ki, cari ilin mart-aprel aylarında ölkə ərazisində, o cümlədən Qusar rayonunda müşahidə olunan intensiv yağıntılar nəticəsində yaranmış fəsadların aradan qaldırılması və infrastrukturun bərpası məqsədilə İlham Əliyev tərəfindən aidiyyəti dövlət qurumlarına maliyyə vəsaiti ayrılıb.
Səyyar qəbul zamanı Hiloba sakinləri bir sıra problemləri gündəmə gətiriblər. Qeyd olunub ki, kənd tibb məntəqəsində tibb işçisi yoxdur, gənclər üçün nəzərdə tutulmuş stadion ərazisi başqa şəxsin adına rəsmiləşdirilib, elektrik xətləri və dirəklər köhnəlib, yaşayış məntəqəsi qazlaşdırılmayıb və kənddə elektrik mühəndisi çatışmır.
RİH başçısı səsləndirilən bütün məsələlərin araşdırılması və həlli ilə bağlı aidiyyəti qurum rəhbərlərinə tapşırıqlar verib. Bildirilib ki, vaxt tələb edən problemlər nəzarətə götürüləcək və görüləcək işlər barədə vətəndaşlara məlumat veriləcək.
