Xaçmaz şəhərinin Nəriman Nərimanov küçəsi, 64 ünvanında yerləşən çoxmənzilli yaşayış binasında elektrik və qaz təsərrüfatının yerləşdirilməsi sakinlərin narazılığına səbəb olub.
Shimal.News-a daxil olan məlumata görə, mənzillərin birinin giriş qapısında elektrik lövhəsi və qaz sayğacı həddindən artıq yaxın quraşdırılıb. O dərəcədə ki, mənzilin qapısı açılıb-bağlandıqda elektrik şitinin qapısına dəyir.
Sakinlər bildirirlər ki, bəzi hallarda sayğaclara baxış keçirən şəxslər qutunun qapısını açıq vəziyyətdə saxlayırlar. Bu isə həm sakinlər, həm də xüsusilə azyaşlı uşaqlar üçün əlavə təhlükə yaradır.
Ən əsası isə, qurğuda vaxtaşırı qısaqapanma halları da müşahidə olunur. Bu isə binada yanğın baş verməsi riskini artırır.
"Əraziyə Fövqəladə Hallar Nazirliyinin əməkdaşları baxış keçiriblər və vəziyyətin təhlükəli olduğunu bildiriblər. Buna baxmayaraq, bu günədək problemin aradan qaldırılması istiqamətində aidiyyəti qurumlar tərəfindən hər hansı tədbir görülməyib", – deyə sakinlər qeyd ediblər.
Sakinlər aidiyyəti qurumlardan təhlükə mənbəyinə çevrilən vəziyyətin qısa zamanda aradan qaldırılmasını xahiş edirlər.
