12 iyul Azərbaycanın müasir hərb tarixində xüsusi yer tutan Tovuz döyüşlərinin başlanmasının növbəti ildönümüdür.
2020-ci il iyulun 12-də Ermənistan silahlı qüvvələrinin dövlət sərhədinin Tovuz rayonu istiqamətində törətdiyi təxribat nəticəsində bir neçə gün davam edən şiddətli döyüşlər baş verdi. Azərbaycan Ordusu düşmənin hücumlarının qarşısını qətiyyətlə aldı və ona ağır zərbələr endirdi.
Tovuz döyüşləri işğal altında olan ərazilərdə deyil, Azərbaycan-Ermənistan dövlət sərhədində baş verməsi ilə xüsusilə yadda qaldı. Strateji əhəmiyyətə malik bu istiqamət Bakı–Tbilisi–Ceyhan neft kəməri, Cənub Qaz Dəhlizi, Bakı–Tbilisi–Qars dəmir yolu kimi beynəlxalq layihələrə yaxınlığı ilə seçilir.
Döyüşlər zamanı Azərbaycan Ordusunun bir sıra igid hərbçiləri şəhidlik zirvəsinə ucaldı. Onların arasında general-mayor Polad Həşimov, polkovnik İlqar Mirzəyev, mayor Anar Novruzov, mayor Namiq Əhmədov, gizir Yaşar Babayev, baş əsgər Elçin Mustafazadə, əsgərlər Nazim İsmayılov, Vüqar Sadıqov, eləcə də iyulun 14-də şəhid olan Dövlət Sərhəd Xidmətinin giziri Elşad Məmmədov yer alır.
Tovuz döyüşləri Azərbaycan cəmiyyətində böyük həmrəylik yaratdı. Minlərlə insan Ordumuza dəstək vermək üçün küçələrə çıxdı, könüllü şəkildə hərbi xidmətə yazılmaq istəyənlərin sayı sürətlə artdı. Bu hadisələr xalqın Vətən uğrunda birliyini və qələbəyə olan inamını daha da gücləndirdi.
Hərbi ekspertlər hesab edirlər ki, Tovuz döyüşləri 44 günlük Vətən müharibəsinə gedən yolun mühüm dönüş nöqtələrindən biri oldu. Həmin döyüşlərdə nümayiş etdirilən qətiyyət və milli həmrəylik cəmi iki ay sonra başlayan Vətən müharibəsində qazanılan tarixi Zəfərin mənəvi və psixoloji əsaslarından biri kimi qiymətləndirilir.
Bu gün Tovuz döyüşlərinin qəhrəmanları xalqımız tərəfindən dərin ehtiramla anılır. Onların göstərdiyi şücaət, Vətənə sədaqəti və fədakarlığı Azərbaycanın müstəqillik tarixinin şərəfli səhifələri sırasında əbədi yaşayacaq.
Allah bütün şəhidlərimizə rəhmət eləsin. Onların əziz xatirəsi daim qəlbimizdə yaşayacaq.
