Bu gün Vətən müharibəsi şəhidi Razik Telman oğlu Salmanovun doğum günüdür.
Razik Salmanov 24 yanvar 2000-ci ildə Qusar rayonunun Gündüzqala kəndində anadan olub. 2006–2017-ci illərdə orta təhsil alıb. Subay idi.
O, 2018-ci ildə Səfərbərlik və Hərbi Xidmətə Çağırış üzrə Dövlət Xidmətinin Qusar rayon şöbəsi tərəfindən hərbi xidmətə çağırılıb, Azərbaycan Silahlı Qüvvələrinin "N" saylı hərbi hissəsində müddətli həqiqi hərbi xidmət keçib. Xidmətini başa vurduqdan sonra isə müddətdən artıq hərbi xidmət qulluqçusu kimi fəaliyyətini davam etdirib.
Azərbaycan Ordusunun əsgəri olan Razik Salmanov 2020-ci il sentyabrın 27-də başlanan Vətən müharibəsində iştirak edib. Cəbrayıl, Füzuli və Xocavənd rayonlarının azadlığı uğrunda gedən döyüşlərdə şücaətlə vuruşub. O, 27 oktyabr 2020-ci ildə Xocavənd rayonunun Cütcü kəndi istiqamətində döyüş tapşırığını yerinə yetirərkən şəhid olub. Uzun müddət nəşi tapılmayan şəhidin cəsədi 3 aylıq intensiv axtarışlardan sonra aşkarlanıb və 27 dekabr 2020-ci ildə doğulduğu Gündüzqala kəndində torpağa tapşırılıb.
Razik Salmanov Azərbaycan Prezidentinin müvafiq sərəncamları ilə ölümündən sonra "Vətən uğrunda", "Cəbrayılın azad olunmasına görə", "Füzulinin azad olunmasına görə" və "Xocavəndin azad olunmasına görə" medalları ilə təltif edilib.
Qəhrəman şəhidimizin əziz xatirəsi xalqımızın yaddaşında daim yaşayacaq.
