Bu gün Vətən müharibəsi şəhidi Fuad Şabanovun doğum günüdür.
Fuad Şabanov 11 iyul 1997-ci ildə Balakən rayonunun Qaravəli kəndində anadan olub. 2003–2014-cü illərdə Ə. Şirinov adına Qaravəli kənd tam orta məktəbində təhsil alıb. Vətənə bağlılığı və mərdliyi ilə seçilən Fuad hər zaman hərbçi olmağı şərəf hesab edirdi.
2015-ci ildə müddətli həqiqi hərbi xidmətə çağırılan Fuad Şabanov 2015–2017-ci illərdə Azərbaycan Silahlı Qüvvələrinin sıralarında xidmət edib. O, 2016-cı ilin Aprel döyüşlərinin iştirakçılarından biri olub və döyüş təcrübəsi qazanıb.
2020-ci il sentyabrın 27-də başlayan Vətən müharibəsində Fuad Şabanov könüllü olaraq cəbhəyə yollanıb. O, Cəbrayıl və Füzuli istiqamətlərində gedən şiddətli döyüşlərdə igidliklə vuruşaraq Azərbaycanın ərazi bütövlüyünün bərpası uğrunda şərəflə döyüşüb.
Fuad Şabanov 2020-ci il oktyabrın 25-də Füzuli uğrunda gedən döyüşlərdə qəhrəmancasına şəhid olub. O, Balakən rayonunun Püştətala kəndində torpağa tapşırılıb.
Şəhid Fuad Şabanov göstərdiyi şücaətə görə Azərbaycan Prezidenti İlham Əliyevin sərəncamları ilə ölümündən sonra "Vətən uğrunda", "Cəbrayılın azad olunmasına görə" və "Füzulinin azad olunmasına görə" medalları ilə təltif edilib.
Bu gün doğum günü qeyd olunan Balakənli qəhrəmanımızın əziz xatirəsi daim ehtiramla anılır. Fuad Şabanovun Vətən sevgisi və fədakarlığı gələcək nəsillər üçün örnək olaraq yaşayacaq.
Allah bütün şəhidlərimizə rəhmət eləsin, ruhları şad olsun!
